មាតិការព័ត៌មានថ្មីៗ
ទីស្នាក់ការកណ្តាល : ភូមិក្រោម, ឃុំព្រែកអញ្ចាញ, ស្រុកមុខកំពូល, ខេត្តកណ្តាល |  លេខទំនាក់ទំនង ចាងហ្វាងការផ្សាយ :  078 55 11 12 / 097 777 6000  | អ៉ីម៉ែល: 168csn@gmail.com | វេបសាយ៍: www.csnpaper.com | ហ្វេសប៊ុក: www.facebook.com/csnpaper

ព្រៃឈើនៅខេត្តស្ទឹងត្រែង កំពុងប្រឈមការវិនាស ដោយស្នាដៃមេឈ្មួញ ស្រេង ម៉េង នឹងបក្ខពួក

​សេចក្តីរាយការណ៍​ពី​ប្រជាពលរដ្ឋ​ក្នុង​ខេត្តស្ទឹងត្រែង​បាន​ឲ្យ​ដឹងថា​ បទល្មើស​បំផ្លាញ​ព្រៃឈើ​តាម​បណ្តា​ស្រុក​នានាៗ​កំពុង​កើត​ទ្បើង​យ៉ាង​ពេញបន្ទុក ហើយ​អាជ្ញាធរខេត្ត និង​នាយសង្កាត់ នាយខ័ណ្ឌរដ្ឋបាល​ព្រៃឈើ​ខេត្ត​ មិន​ចាត់វិធានការ​ទប់ស្កាត់​នោះទេ​។ គេសង្កេតឃើញមួយរយៈ​ពេល​នេះ ​នៅ​ចំណុច​អូរ​ដា ភូមិគ​ភោគ និង​ទួល​សេ​វ៉ា ចំណុច​១០១ ខាងកើត​ទន្លេ​ជាប់​ព្រំប្រទល់​ទ្បា​វ​ ចំណុច​១០១​មាន​បទល្មើស​បំផ្លាញ​ព្រៃឈើ​យ៉ាង​មហន្តរាយ​ ដោយ​ច្រក​ក្រោម​ស្លាក​ក្រុមហ៊ុន​របស់​ឧកញ៉ា ទ្រី ភាព ។ មន្ត្រី​អង្គការក្រៅរដ្ឋាភិបាល​ក្នុង​ខេត្តស្ទឹងត្រែង​បាន​លើកទ្បើង​ថា​៦០​ភាគរយ​នៃ​ព្រៃឈើ​ក្នុង​ខេត្តស្ទឹងត្រែង​ ត្រូវ​បំផ្លាញ​ដោយមេឈ្មួញធំៗ​ប្រមូលទិញឲ្យក្រុមហ៊ុន​របស់​ឧកញ៉ា ទ្រី ភាព ដែលមាន​ទំនាក់ទំនង​ជិតស្និទ្ធ​ជាមួយ​ថ្នាក់ដឹកនាំធំៗក្នុងខេត្តស្ទឹងត្រែង។

​ប្រជាពលរដ្ឋ​រស់នៅ​ខេត្តស្ទឹងត្រែង មានដូចជាស្រុក​សៀមបូក ស្រុកសៀមប៉ាង ស្រុកថា​ទ្បា​បរិ​វ៉ា​ត់ ឪ និង​ស្រុក​សេ​សាន ជាប់​ឧទ្យាន​ជាតិ​វីរៈ​ជ័យ​បាន​ឲ្យ​ដឹងថា​ ស្រេង ម៉េង ជាមេ​ឈ្មួញបំផ្លាញព្រៃឈើកំពូលល្បិច បាន​ប្រើ​គ្រប់​វិធី​ដើម្បី​កាប់​ឈើ​ប្រណីត​ដឹកជញ្ជូន​យកទៅលក់​នៅ​ប្រទេស​យួន​ និង​ប្រទេស​ផ្សេងទៀត ​ដោយ​គ្មាន​ខ្លាចក្រែង​អ្វី​ទាំងអស់​។

កាលពីមុន​មានតែ​ឈើ​ប្រណីត​ប្រភេទ​គ្រញូង បេង នាងនួន និង​ធ្នង់ ប៉ុណ្ណោះ​ដែល​ប្រឈម​នឹង​ការបំផ្លាញ​យ៉ាង​មហន្តរាយ​ដោយមាន​ការឃុបឃិត​ជាមួយ​ លោក កុល សំអុល អភិបាលខេត្ត​ស្ទឹងត្រែង​ និង​លោក ឈាង តុលា ជានាយរដ្ឋបាល​ព្រៃឈើ​ខេត្ត​ស្ទឹងត្រែង។ ឥ​ទ្បូ​វ​នេះ​សូម្បីតែ​ឈើ​ប្រភេទ​ផ្ចិ​ក សុ​ក្រំ និង​ស្រ​ទ្បៅ ក៏ត្រូវ​គេ​កាប់​អារច្រៀក​ដឹកជញ្ជូន​ចេញពី​ព្រៃ​ចូលទៅក្នុងឃ្លាំងស្តុក​រប​ស់​មេ​ឈ្មួញ ស្រេង ម៉េង យ៉ាង​ពេញបន្ទុក​ដែរ​។​

​មន្ត្រី​អង្គការក្រៅរដ្ឋាភិបាល​បាន​លើកទ្បើង​ថា​ បទល្មើស​បំផ្លាញ​ព្រៃឈើ​ក្នុង​ខេត្តស្ទឹងត្រែង​បានចាប់ផ្តើម​ខ្លាំង​បំផុត​តាំងពី​ចុងខែ​តុលា ឆ្នាំ​២០១៤ ​រហូតមកដល់​បច្ចុប្បន្ន ហើយ​ឈើ​ប្រណីត​ដូច​រៀបរាប់​ខាងលើ​ស្ទើរតែ​គ្មាន​សល់​ក្នុងព្រៃ​ទៀត​ទេ​។ សូម្បី​តែព្រៃ​សហគមន៍ ព្រៃ​ដែន​ជម្រក​សត្វ និង​ព្រៃ​បញ្ចុះសព​ដូនតា​របស់​ជនជាតិដើម​ភាគតិច​ ក្នុងស្រុក​សេ​សាន​ និង​ស្រុក​នានា​ ក៏​ប្រឈម​នឹង​ការបំផ្លាញ​យ៉ាង​ហិនហោច​ក្រោម​ស្នាដៃ​មេ​ឈ្មួញ ស្រេង ម៉េង និង​បក្ខពួក​ផងដែរ​។

ដូច្នេះ​ក្រសួង​និង​ស្ថាប័ន​ពាក់ព័ន្ធ​ត្រូវ​ចាត់វិធានការ​ទប់ស្កាត់​ជាបន្ទាន់ ព្រោះ​ព្រៃឈើ​៦០​ភាគរយ​នៅក្នុង​ខេត្តស្ទឹងត្រែង​ត្រូវ​មេ​ឈ្មួញ ស្រេង ម៉េង ​បំផ្លាញ​តាម​អំពើ​ចិត្ត​៕

 

image image image

Share on Facebook