តុលាការសាកសួរជនសង្ស័យបាញ់សម្លាប់ឧកញ៉ា អ៊ឹង ម៉េងជឺ បានបញ្ចប់ហើយ

ចំនួនអ្នកបានអាន: 499

ភ្នំពេញៈ ចៅក្រមស៊ើបសួរនៃសាលាដំបូងរាជធានី លោក លី សុខលេង នៅព្រឹកថ្ងៃចន្ទបានកោះហៅ ជនជាប់ចោទឈ្មោះ សៀង វាសនា អង្គរក្សឧកញ៉ា ថោង សារ៉ាត់ មកសាកសួរ បន្ទាប់ពី សមត្ថកិច្ចសង្ស័យជាជនដៃដល់បាញ់សម្លាប់ឧកញ៉ា អ៊ឹង ម៉េងជឺ ថៅកែក្រុមហ៊ុនស៊ីម៉ងត៍ត្បូងពេជ្រនិងជាប្រធានក្រុមហ៊ុន Shimmex Group កាលពីព្រលប់ថ្ងៃទី២២ ខែវិច្ឆិកា ឆ្នាំ២០១៤ នៅមុខហាងលក់ផ្លែឈើឡោតិចសេង ក្នុងសង្កាត់ទួលស្វាយព្រៃទី២ ខណ្ឌ ចំការមន រាជធានីភ្នំពេញ។

ជនជាប់ចោទ សៀង វាសនា ត្រូវ អនុរក្សពន្ធនាគារព្រៃសបញ្ជូនមកសាលាដំបូងរាជធានី កាលពីព្រឹកថ្ងៃចន្ទ ទី០៩ ខែកុម្ភៈ ឆ្នាំ២០១៥នេះ ដើម្បីសាកសួរតាមដីកាកោះរបស់ចៅក្រមស៊ើបសួរ លី សុខលេង។

លោក គា អ៊ាវ មេធាវីការពារក្តីឈ្មោះ សៀង វាសនា បានប្រាប់ថា នៅពេលសាកសួរពីម្សិលម្ងៃលោកចៅក្រមបានសួរកូនក្តីលោកឡើងវិញពីដើម ដល់ចប់និងបញ្ចប់ការសាកសួរនៅម៉ោងជិត១២ថ្ងៃត្រង់។

លោកមេធាវី គា អ៊ាវ បញ្ជាក់ថា ៖ «លោកចៅក្រមស៊ើបសួរបានសួរកូនក្តីខ្ញុំឡើងវិញពីដើមដល់ចប់ និងបានសួរពីទីកន្លែងដែលគាត់បានទៅ ខណៈ ដែលជនរងគ្រោះ(ឧកញ៉ាអ៊ឹង ម៉េងជឺ) ត្រូវគេបាញ់សម្លាប់កាលពីព្រលប់ថ្ងៃទី២២ ខែវិច្ឆិកា ឆ្នាំ២០១៤ នៅមុខហាងលក់ផ្លែឈើ ក្នុងសង្កាត់ទួលស្វាយព្រៃ ទី២ ខណ្ឌចំការមន»។

លោកមេធាវីបន្ថែមថា៖«កូនក្តីខ្ញុំបានឆ្លើយថា នៅព្រលប់ថ្ងៃទី២២ វិច្ឆិកានោះ និងនៅពេលដែលក្តីឃាតកម្ម កំពុងកើតឡើងគឺគាត់ស្នាក់នៅក្នុង ខេត្តកំពង់ឆ្នាំង ជាមួយនឹងក្រុមគ្រួសារ។ គាត់ពុំមានវត្តមាននៅក្នុងរាជធានីភ្នំពេញទេ។ គាត់ក៏បដិសេធថា គាត់មិនដែលសារភាពម្តងណានោះទេ»។

លោកមេធាវី និយាយដែរថាយោងតាមចម្លើយ សៀង វាសនា គឺគាត់មិនពាក់ព័ន្ធនឹងឃាតកម្មបាញ់សម្លាប់លោកឧកញ៉ា អ៊ឹង ម៉េងជឺ ទេ តែជាជនរងគ្រោះនៅក្នុងរឿងក្តីនេះ។

លោកចៅក្រមស៊ើបសួរ លី សុខលេង មិនអាចទាក់ទងសុំការអត្ថាធិប្បាយបានទេដោយសារលោកមិន លើកទូរស័ព្ទ។ ទោះយ៉ាងណាមន្ត្រី តុលាការមួយរូបសុំមិនឲ្យបញ្ចេញឈ្មោះបានប្រាប់ភ្នំពេញប៉ុស្តិ៍ថា កាលពីម្សិលមិញលោកចៅក្រមស៊ើបសួរបានសាកសួរជនជាប់ចោទសៀង វាសនា ចប់ហើយ ហើយលោកចៅក្រមនឹងកោះហៅជនជាប់ចោទ ៣នាក់ទៀតមកសាកសួរបន្តបន្ទាប់គ្នានៅពេលខាងមុខនេះ។

ទាក់ទងករណីឈ្មោះ លី សៅ ហៅ វី ភេទប្រុសអាយុ៤៣ឆ្នាំ ជនសង្ស័យជាអ្នកបើកម៉ូតូឌុបឈ្មោះសៀង វាសនា ធ្លាប់ប្រាប់អ្នកកាសែតកាលពីថ្ងៃទី៥ ខែធ្នូ ឆ្នាំ២០១៤ថា នៅថ្ងៃនិងពេល ដែលជនរងគ្រោះ(អ៊ឹង ម៉េងជឺ)ត្រូវគេ បាញ់សម្លាប់នោះ ពួកខ្លួននិងលោកឧកញ៉ា ថោង សារ៉ាត់ នៅហូបសាច់គោអាំងក្នុងហាង«សាច់គោអាំងភូមិយើង»នៅជិតស្ថានទូតរុស្ស៊ី ក្នុងសង្កាត់ទន្លេបាសាក់ ខណ្ឌចំការមន។ ពួកខ្លួននិងលោកឧកញ៉ា ថោង សារ៉ាត់ បានអង្គុយហូបសាច់គោអាំងនៅទីនោះ ពីម៉ោង៧រហូតដល់ម៉ោង៩យប់។

ឈ្មោះ លី សៅ និយាយថា៖ «ខ្ញុំ មិនបានដឹងឬពាក់ព័ន្ធនឹងការបាញ់សម្លាប់ឧកញ៉ា អ៊ឹង ម៉េងជឺ ដូចការចោទប្រកាន់ទេ។ ខ្ញុំបានដឹងរឿងឃាតកម្មនេះតាមការផ្សព្វផ្សាយតាមទូរស័ព្ទនិងប្រព័ន្ធផ្សព្វផ្សាយប៉ុណ្ណោះ។ ប៉ុន្តែប៉ូលិសបានចាប់វាយដំនិងចាប់កាច់ជើងខ្ញុំ ដែលដាក់ដែកបណ្តាលឲ្យរងរបួសហើយបង្ខំឲ្យខ្ញុំសារភាព។ តែតាមពិតខ្ញុំមិនដឹងអីទេ និងជាជនស្លូតត្រង់និង រងគ្រោះទេ»។

ប៉ុន្តែមន្ត្រីនគរបាលព្រហ្មទណ្ឌរាជធានីម្នាក់បដិសេធចំពោះការចោទខាងលើនេះ ហើយថា ការសួរចម្លើយនៅ នគរបាលយុត្តិធម៌មិនមានការវ៉ៃដំឬ ធ្វើទារុណកម្មពួកគេនោះទេ។

យោងតាមឯកសារតុលាការ ពាក់ព័ន្ធនឹងសំណុំរឿងឃាតកម្មលោកឧកញ៉ា អ៊ឹង ម៉េងជឺនេះអង្គរក្សផ្ទាល់លោកឧកញ៉ា ថោង សារ៉ាត់ ចំនួន៤នាក់ត្រូវសាលាដំបូងរាជធានីឃុំខ្លួននិងចោទប្រកាន់ពាក់ព័ន្ធនឹងការបាញ់សម្លាប់លោកឧកញ៉ា អ៊ឹង ម៉េងជឺ។ ជនជាប់ចោទទាំង៤នាក់មានឈ្មោះសៀង វាសនា ភេទប្រុស អាយុ៤៤ឆ្នាំ (សង្ស័យជាខ្មាន់កាំភ្លើងជនដៃដល់)និងលី សៅ ហៅ វី ភេទប្រុស អាយុ៤៣ឆ្នាំ (សង្ស័យអ្នកបើកម៉ូតូឌុបឃាតករ)ឈ្មោះ មាស សម្បត្តិ ភេទប្រុស អាយុ២៧ឆ្នាំ (សង្ស័យអ្នកបើកម៉ូតូបិទគូទ) និង ឈ្មោះ កូយ ចាន់ថុល ភេទប្រុស អាយុ២៩ឆ្នាំ (សង្ស័យអ្នកជិះម៉ូតូពីក្រោយ និងចុះពិនិត្យផ្ទាល់)។ ជនត្រូវចោទ ឈ្មោះ ថោង សារ៉ាត់ និងគូកនផ្សេង ទៀតត្រូវតំណាងអយ្យការចោទប្រកាន់ពីបទផ្តើមគំនិតក្នុងអំពើគិតទុកជាមុន យោងតាមមាត្រា ២៨ និង២០០នៃ ក្រមព្រហ្មទណ្ឌ៕ ដោយ៖ តាំង ស៊ុនតិច