លោក នូ ស៊ីថា អតិតឈ្មួញឈើ នឹងជាមេគយ ប្រចាំច្រកដូង៧ដើម ក្លាយជាមេសាខាគយខេត្តត្បូងឃ្មុំ បែកធ្លាយរឿងពុករលួយ តម្រូវឲ្យឈ្មួញបង់លុយក្រៅផ្លូវការណ៍ នឹងគៃបំបាត់ពន្ធរដ្ឋ

ចេញផ្សាយដោយ ៖ អង្គភាព « CSN » ទំនាក់ទំនងផ្សាយពាណិជ្ជកម្ម 097 777 6000

ខេត្ត​ត្បូងឃ្មុំ ៖ មកទល់ពេលនេះ នៅតែមានការ លើកឡើង និយាយតៗគ្នា រឿងលោក នូ ស៊ីថា អតីត​ប្រធានការិយាល័យគយ ច្រកទ្វារដូង ៧ដើម ដែលទើបផ្លាស់ប្ដូរ មកកាន់តំណែង ជាប្រធានសាខាគយនឹងរដ្ឋាករ ខេត្តត្បូងឃ្មុំ ថ្មីៗនេះថា៖ លោក នូ ស៊ីថា មក​កាន់​ជា​មេ​សាខាគយ​ ខេត្តត្បូងឃ្មុំ​នោះ ហាក់​កំពុង​ត្រូវប៉ាន់ ឡើង​យីអ៊ុន​ខ្លាំងណាស់ ក្នុងករណីប្រព្រឹត្ត​អំពើពុករលួយ ​របស់​គាត់ គឺ​កំពុងតែ​ល្បីល្បាញ​ តែ​ខាង​គាបជម្រិត ​ឲ្យ​ក្រុម​ឈ្មួញ​បទល្មើសសេដ្ឋកិច្ច​ និង​មេ​ឈ្មួញ​បទល្មើសព្រៃឈើ ​ចូល​បង់លុយ​គិតជាជើង​ នឹងបង់លុយគិតជាខែ ​មួយចំនួន ​យ៉ាង​គ្រប់ទឹក​តែម្ដង មិនគួរ​ឯកឧត្តម ឱម យិនទៀង ប្រធានអង្គភាព​ប្រឆាំង​អំពើពុករលួយ ​មើលរំលង​ទេ។​

ប្រភពព័ត៌មាន ពីក្រុម​មន្ត្រីគយ ​និង​ឈ្មួញ​មួយចំនួន​ដែល​រកស៊ី​ ដឹក​ទំនិញ​គេច​ពន្ធ​ និង​ដឹក​បទល្មើស​ព្រៃឈើ​ កំប៉ិចកំប៉ុ​ក បានទម្លាយ​ឲ្យអង្គភាព CSN យើង​ដឹង​ថា៖ ចាប់តាំងពី​​លោក នូ ស៊ីថា អតីត​ជា ឈ្មួញ​រកស៊ី​ឈើ​ និង​ជា​មេ​គយ ប្រចាំ​ច្រក​ដូង​ ៧​ដើម បាន​រត់ការ​ឡើង​ធ្វើ​ជា​ប្រធាន​សាខាគយ និង​រដ្ឋាករ​ ប្រចាំអាណាចក្រ​ ខេត្ត​ត្បូងឃ្មុំ ជា​តំបន់​សេដ្ឋកិច្ច​ ពេលណា​មក គឺ​ក្រុម​ឈ្មួញ​ទាំងអស់ បាន​ប្រមូលគ្នា ​មក​ដឹកជញ្ជូន​បទល្មើស​សេដ្ឋកិច្ច​ នៅ​តាម​ច្រករបៀង​ និង​តាម​ច្រក​អន្តរជាតិ​ ក្នុងខេត្ត​នេះ​ យ៉ាង​ផុលផុស​បំផុត ។​

ថ្មីៗ​នេះ​ មានសេចក្ដីរាយការណ៍ បានឲ្យដឹងថា៖ មាន​ការដឹកជញ្ជូន​ឈើ​ខុសច្បាប់ ​និង​ការហូរ​ចូល​ទំនិញ​បង់ពន្ធ​មិន​គ្រប់ ដែលគេ​សង្កេតឃើញ​លោក នូ ស៊ីថា បាន​ប្រើ​ឥទ្ធិពល​របស់​ខ្លួន ប្រៀប​បាន​នឹង​ស្តេចត្រាញ់​ក្តោបប្រភព​ចំណូល​សេដ្ឋកិច្ច​ យ៉ាងណែន​ពេញដៃ មិន​ដែល​ក្រែង ញញើត​ ពី​ការ​រឹតបន្តឹង ​របស់​អង្គភាព​ប្រឆាំង​អំពើពុករលួយ​នោះទេ ។ ហើយ​ឈ្មួញ​ទាំង​តូច​ទាំង ធំ​សុទ្ធតែ​ញាក់សាច់​គ្រប់ៗ​គ្នា​ មិនសូវហ៊ាន​ក្អក​ ជាមួយ​លោក នូ ស៊ីថា ដែល​ជា​មេ​គយ​ដ៏​មហិមា ប្រចាំ​ខេត្ត​ត្បូងឃ្មុំ​នោះទេ ដោយ​ខ្លាច​គាត់​ គាប​លែង​យល់យោគ ពិតជាយ៉ាប់ហើយ។

បើតាម​ប្រភព​ផ្ទៃក្នុង​ ពីមន្ត្រី​គយតូចតាច មួយចំនួន ​បានអោយដឹងថា កាលពីមុន ​ពួកគេ​អាច​រក​ចំណូល​ ពី​ការងារ​កំប៉ិកកំប៉ុក តាមរយៈ​ការ បន្តក់​ពី​ក្រុម​ឈ្មួញ​រកស៊ី​ដឹកជញ្ជូនឈើ និង​ឈ្មួញ​នាំចូល​ទំនិញ​បង់ពន្ធ​មិន​គ្រប់គ្រាន់ រួច​ថ្លៃ​បាយ​ នឹងទុក​ផ្ញើឲ្យប្រពន្ធ​កូន ​រៀងរាល់ ពេល​ដាច់​ខែ​បាន​ខ្លះៗ​ផងដែល។​

តែមកទល់នេះ ​ផ្ទុយទៅវិញ ចាប់តាំងពី​ពេលដែល​ រាជរដ្ឋាភិបាល​ ប្រកាស បង្កើត​ខេត្ត​ត្បូងឃ្មុំ ហើយ​លោក នូ ស៊ីថា ក៏​បាន​ចាយលុយ ​តូ​រត់ការ ឡើង​ធ្វើជា​ប្រធាន​សាខាគយ ​ខេត្ត​ត្បូងឃ្មុំ​ថ្មី​នោះ ដែល​គេដឹងថា ជា​ប្រភព​ចំណូល​គ្រប់បែប​យ៉ាង ​មិន​ចេះ​រីងស្ងួត​ និង​ត្រូវបាន លោក នូ ស៊ីថា ក្តោប​យ៉ាង​ណែន​ពេញដៃ​មិន​ឲ្យ​របូត​ដល់ដៃ​មន្ត្រី តូចតាច​នោះ​ទេ​ ហើយ​ជា​ធម្មតា លោក នូ ស៊ីថា បាន​ប្រើប្រាស់ លោក យឹម វណ្ណៈ ជា​មេ​គយ ច្រក​ដូង​៧​ដើម ជា​សេនាធិការ​ ឲ្យកាន់​ការងា​រ​សេដ្ឋកិច្ច​ប្រមូលលុយ ​យក​ទៅ​ចែក​គ្នា​ធ្វើ​មាន ​ធ្វើបាន​ យ៉ាង​ក្រអឺតក្រទម​បំផុត ។ ​

ជាងនេះទៅទៀត បើ​តាម​ក្រុម​អ្នករកស៊ី​ ដឹក​ជញ្ជូន​ឈើ​ខុសច្បាប់​ មួយចំនួន បានឲ្យដឹង​ថា ​លោក នូ ស៊ីថា បាន​តាំងខ្លួន​ជា ស្តេចត្រាញ់ ដ៏​មាន​ឥទ្ធិពល​ ប្រចាំច្រក​ដូង ​៧​ដើម យ៉ាង​ល្បី​ខាង​គោះ​គាប​ជំរិត​ លើ​ខ្នង​អាជីវករ ក្រុម​ឈ្មួញ​ និង​គៃបំបាត់​ពន្ធ​រដ្ឋ​ ជា​យូរ​ឆ្នាំ​មកហើយ ។​

​ថ្មីៗ​នេះ​ មន្ត្រី​គយ​បានលើកឡើង ​ឲ្យដឹងថា ដើម្បី​ទប់ស្កាត់​ ការ​បែកធ្លាយ​ព័ត៌មាន​អាស្រូវ​នោះ លោក នូ ស៊ីថា ក៏បាន ពង្រីក​អំណាច​កាន់តែ​ខ្លាំង បន្ទាប់​ពី​ឡើង​តំណែង ​ជា​មេ​គយ ខេត្ត​ត្បូងឃ្មុំ​ ពេញ​សិទ្ធហើយ​នោះ គឺ លោក នូ ស៊ីថា ដែល​ជា​អតីត​ ជា​ឈ្មួញ​រកស៊ី​ឈើ ​និង​មាន ខ្នងបង្អែក​ក្រាស់​ ពី​ឧកញ៉ា លឹម ប៊ុន​ណា « ហៅ​ខ្នា » ដែល​ជា​ឈ្មួញ រកស៊ី​ឈើ​ធំជាងគេ​ ប្រចាំ​ភូមិភាគ​ឦសាន​ផង​នោះ បាន​ប្រើប្រាស់​ មេ​ច្រក​អន្តរជាតិ​ និង​ច្រករបៀង​ ជា​សេនាធិការ​ ឲ្យ​គៀងគរ គាប​ជម្រិត​ជាន់​.​ក​ឈ្មួញ​ ប្រព្រឹត្តអំពើ​ពុករលួយ​ យ៉ាង​ពេញបន្ទុក​ ​ដូច​ជា​មេ​គយ​ប៉ុស្តិ៍​ ត្រពាំងផ្លុង​ជាដើម ។

​ក្រៅពី​ប្រើ​ជំនាញ​ គាប​គោះ​ទៅលើ​ក្រុមឈ្មួញ​ យ៉ាង​ស្ទាត់ជំនាញ​ហើយ​នោះ គឺលោក នូ ស៊ីថា ក៏​បាន​គៀងគរ ហៅ​ក្រុម​ឈ្មួញ​បទល្មើស​ព្រៃឈើ​ និង​បទល្មើស​សេដ្ឋកិច្ច​ ស្ទើរគ្រប់​ប្រភេទ​ ឲ្យមក​ចូល​តាម​ច្រក របស់​ខ្លួន ​ងាយស្រួល​ឲ្យ​ខ្លួន​ ក្នុងការ​កើ​បយក​ចំណូល​បទ
ល្មើសសេដ្ឋកិច្ច​ ទៅធ្វើ​មានបាន​ផ្ទាល់ខ្លួន យ៉ាង​ត្រេកត្រអាល​បំផុត មិនគួរបើ​លោក អូន ព័ន្ធមុនីរ័ត្ន និង​លោក​មេ​គយ​ធំ គុណ ញឹម មើលរំលង​សកម្មភាព ​របស់​គាត់​ទេ ។​

ពាក់ព័ន្ធការលើកឡើង នឹងរិះគន់ខាងលើ អង្គភាព CSN មិនទាន់អាចសុំកាបំភ្លឺ ពីលោក នូ ស៊ីថា ប្រធានសាខាគយនឹងរដ្ឋាករ ខេត្តត្បាូងឃ្មុំ បានទេថ្ងៃនេះ ដោយគ្មានលេខទូរស័ព្ទ ធ្វើការទំនាក់ទំនង អង្គភាពយើងរង់ចាំ ការបកស្រាយពីលោក នូ ស៊ីថា នៅពេលក្រោយ រាល់ម៉ោងធ្វើការ។

សូមបញ្ជាក់ រាល់ការចេញផ្សាយ អង្គភាពយើង ផ្សាយតែព័ត៌មានពិត ជាក់លាក់ ច្បាស់លាស់ មិនលំអៀង គឺយោងទៅតាមប្រភព ច្បាស់ការណ៍ នឹងឯកសារមួយចំនួន ប្រសិនសាមីខ្លួន ឬស្ថាប័នពាក់ព័ន្ធ គិតថា មិនត្រឹមត្រូវ សម្ដេច ទ្រុង ឯកឧត្តម ឧកញ៉ា លោកជំទាវ អស់លោក លោកស្រី អាចធ្វើលិខិតស្នើសុំ មកការិយាយ័ល អង្គភាពយើងខ្ញុំ ដោយមានឯកសាមួយចំនួន ដើម្បីធ្វើការកែតម្រូបាន តារយៈទូរស័ព្ទ លេខ 097 777 6000 រាល់ម៉ោងធ្វើការ៕ ដោយអ្នកប្រមាញ់

 

សូមជួយស៊ែរព័ត៌មាននេះផង: