8 ចំនុចដើម្បីបញ្ជៀសពីគ្រោះថ្នាក់ធំៗដូចកាលរត់ជាន់គ្នានៅកោះពេជ្រឆ្នាំ ២០១០ ក្នុងពិធីបុណ្យអុំទូក

ចំនួនអ្នកបានអាន: 970

នៅសល់ប្រហែលតែ២០ថ្ងៃទៀតតែប៉ុណ្ណោះ ពិធីបុណ្យអុំទូក អកអំបុក និងសំពះព្រះខែដ៏អធិកអធមនឹងឈានចូលមកដល់។ តើប្រិយមិត្តនៅចាំបានទេអនុស្សាវរីយ៍ដ៏ស្លុតរន្ធត់មួយកាលពី ពិធីបុណ្យអុំទូកនៅឆ្នាំ ២០១០ កន្លងទៅ? កាលនោះនៅឯស្ពានពេជ្រមានការរត់ជាន់គ្នាស្លាប់ ៣៤៧ នាក់(ការប្រកាសជាផ្លូវការរបស់រដ្ឋាភិបាល) ប្រភពខ្លះថា ៣៧៩ នាក់ និងរបួស ៤៥៦ នាក់(ការប្រកាសជាផ្លូវការរបស់រដ្ឋាភិបាល) ប្រភពខ្លះថា ៧៥៥ នាក់។ ទោះជាយ៉ាងណាចំនួនទាំងនេះច្រើនខ្លាំងណាស់ គឺត្រឹមតែមួយយប់សោះមានមនុស្សស្លាប់ និងរបួសធ្ងន់ស្រាលដល់ប៉ុណ្ណឹង! ដែលមិនគួរឲ្យជឿ…។

តើបទពិសោធន៍នៃការរត់ជាន់គ្នាស្លាប់ និងរបួសដ៏ច្រើននៅកោះពេជ្រកាលពីឆ្នាំ ២០១០ អាចធ្វើឲ្យប្រជាជនខ្មែរខ្លាចរាងចាល ហើយលែងចង់ទៅចូលរួមពិធីបុណ្យអុំទូកនៅក្នុងឆ្នាំ ២០១៤ នេះដែរឬទេ? “ទេ!” ព្រោះមនុស្សជាច្រើនរង់ចាំជាយូរហើយ!!! ពិធីនេះត្រូវអាក់ខានធ្វើបីឆ្នាំជាប់ៗគ្នាដោយសារមូលហេតុ ទឹកជំនន់ និងការសោយទិវង្គតរបស់សម្តេចតាសីហនុ។ មនុស្សភាគច្រើនចង់ឲ្យពិធីដ៏សំបើមនេះត្រលប់មកវិញខ្លាំងណាស់ ពិសេសអ្នកដែលគ្មានសមាជិកគ្រួសាររងគ្រោះកាលពីឆ្នាំ ២០១០ គឺសឹងតែភ្លេចអស់ទៅហើយនូវព្រឹត្តិការណ៍ដ៏ស្លុតរន្ធត់គ្មានពីរ នេះ។

ពិធីបុណ្យអុំទូកជាពិធីបុណ្យតែមួយ គត់ដែលមានការជួបជុំដ៏ធំបំផុតប្រចាំឆ្នាំ។ មន្រ្តីទាំងអស់នៅក្នុងស្ថាប័ននានានៅទូទាំងប្រទេសត្រូវបានឈប់ សំរាក។ សំរាប់អ្នកស្រែចំការវិញ ពិធីបុណ្យអុំទូក គឺជាឱកាសដ៏ល្អសំរាប់ពួកគេក្នុងការមកកំសាន្តនៅទីក្រុងទាំងមក ដើម្បីគាំទ្រអ្នកអុំទូក និងមកតាមរយៈមូលហេតុកំសាន្តផ្សេងៗ។ ជាពិសេសទីណាដែលមានមនុស្សអ៊ូអរ គឺជាអ្វីដែលខ្មែរចូលចិត្តបំផុត!!! នេះគឺជាចរិតខ្មែរ។ កាន់តែថ្មី! ភ្នំពេញឥឡូវក៏មានកន្លែងកំសាន្តច្រើនណាស់ដែរ។ អ្នកភ្នំពេញក៏ចង់មើលការប្រណាំងទូក ឬឆ្លៀតឱកាសរកស៊ី ឯអ្នកស្រែចំការក៏ចង់មកភ្នំពេញ…! អញ្ចឹងការជួបជុំដ៏ធំមួយនឹងកើតមានឡើង។

តើបុណ្យអុំទូកនៅឆ្នាំនេះអាចនឹង មានគ្រោះថា្នក់ដ៏ធំណាមួយដូចកាលរត់ជាន់គ្នានៅកោះពេជ្រកាល ឆ្នាំ ២០១០ ដែរឬទេ? “អាច!!!” ហើយអាចមានគ្រោះថ្នាក់ក្នុងរូបភាពផ្សេង ឬក៏កន្លែងផ្សេងតែមិនដដែលដូចនៅកោះពេជ្រទៀតទេ។ ដូច្នេះ ដើម្បីរួមចំណែកក្នុងការបញ្ជៀសគ្រោះថ្នាក់ធំដ៏រន្ធត់ណាមួយ ដែលអាចកើតឡើងជាលើកទី២នោះ CAMTOPTEC សូមធ្វើការវិភាគតាមការយល់ឃើញផ្ទាល់ និងសូមអ្នកទាំងអស់គ្នាជួយគិតពិចារណាអំពីចំនុចសំខាន់ៗចំនួន 8 ដូចខាងក្រោម៖

១. ត្រូវមានភាពជាម្ចាស់ការលើខ្លួនឯង៖ នេះជាចំនុចមួយដ៏សំខាន់ជាងគេបំផុតសំរាប់អ្នកដែលនឹងទៅលេងបុណ្យ អុំទូក។ គេបោកប្រាស់បានក៏ព្រោះតែយើងខ្លួនឯងគិតមិនយល់ ហើយពេលគេផ្អើលរួចផ្អើលតាមគេក៏ព្រោះតែខ្លួនឯងឆាប់ជឿតាមគេ ភ្លាមៗ ដោយមិនគិតរកហេតុរកផលឲ្យបានច្បាស់លាស់ហើយធ្វើការសំរេចចិត្ត ឲ្យបានត្រឹមត្រូវ។ បែបនេះ គឺពិតជានឹងនាំខ្លួនទៅរកគ្រោះថ្នាក់ដោយខ្លួនឯងផ្ទាល់។ ជាក់ស្តែងដូចកាលស្លាប់នៅកោះពេជ្រកាលពី ៣ ឆ្នាំកន្លងទៅ អ្នកដែលកំពុងតែដើរប្រជ្រៀតគ្នានៅលើស្ពានពេជ្រពេលនោះពេលដែល លឺគេបង្អើលលេងថាស្ពាន់បាក់ៗក៏មិនបានគិតពិចារណាសោះទេ គឺគិតតែពីភ័យយកគ្នាតែម្តង។ មិនគិតសោះថា ស្ពាននាគជាស្ពានថ្មីចែសដែលគេចាក់គ្រឹះបេតុងយ៉ាងរឹងមាំមិន គួរអីដែលវាត្រូវបាក់ងាយៗសោះណ៎????

ភាពជាម្ចាស់លើខ្លួនឯងនេះគឺចង់សំដៅទៅលើអ្វីដែលខ្លួនអ្នកមាន ដូចជាកំលាំងចិត្ត ការគិតពិចារណា និងកំលាំងកាយរបស់អ្នក ហើយអ្នកត្រូវដឹងឲ្យច្បាស់ និងចេះប្រើវាដោយខ្លួនឯង។ ឧទារហណ៍ បើសិនជាទីណាមួយមានមនុស្សច្រើនខ្លាំងហើយអ្នកចង់ដើរចូលទៅទី នោះ តើអ្នកច្បាស់លាស់ហើយឬនៅថា វានឹងគ្មានបញ្ហាអ្វីកើតឡើងដូចជាខ្យល់គទេ? គ្មានអ្នកណាឆក់កាបូបទេ… ព្រោះអ្នកមិនបានយកកាបូប ឬរបស់មានតំលៃមកតាមខ្លួនទេ។ គិតពិចារណាថានឹងគ្មានហេតុណាមួយកើតឡើងទេ…ពេលច្បាស់លាស់ហើយ ទើបសំរេចចិត្តថាទៅ ឬក៏អត់? ចូរចងចាំឲ្យបានច្បាស់ថា អ្នកគឺជាមនុស្សទីមួយដែលធ្វើឲ្យធ្វើឲ្យខ្លួនឯងមាន ឬគ្មានគ្រោះថ្នាក់ ចំណែកឯអ្នកដទៃដែលបង្កបញ្ហាក៏មិនអាចធ្វើអ្វីអ្នកបានដែរ បើអ្នកច្បាស់លាស់អំពីខ្លួនអ្នក។

២. កុំបង្កើតពាក្យចាមអារ៉ាម ឬបង្កឲ្យមានចលាចលឲ្យសោះ!!!៖ សុភាសិតចិនមួយនៅក្នុងរឿងសាមកុកបានពោលថា”ពាក្យចាមអារ៉ាមក៏ អាចសំលាប់មនុស្សបានដែរ ហើយសំលាប់មនុស្សបានលឿនជាងការប្រើអាវុធ និងមិនឃើញឈាមទៀតផង”។ ដូច្នេះ អ្នកដែលបង្កើតពាក្យចាមអារ៉ាមដំបូងគេអាចគឺជារូបអ្នក! សូមអ្នកកុំមើលរំលងខ្លួនឯងឲ្យសោះ ហើយសូមមេត្តាកុំលេងល្បែងបង្កើតពាក្យចាមអារ៉ាម ឬបង្កឲ្យមានចលាចលណា។ ជួនកាលទោះបីជាអ្នកមិនបានបង្កើតជាពាក្យចាមអារ៉ាមឡើងតែ គ្រាន់តែស្រែកបន្ទរតាមគេដើម្បីបញ្ជូនពាក្យចាមអារ៉ាមក៏ជាការបង្ក បញ្ហាដ៏គ្រោះថ្នាក់សំរាប់អ្នកដទៃបានដែរ។

ពាក្យចាមអារ៉ាមមានន័យថា អ្នកនិយាយអំពីរឿងមិនពិតដែលអាចបង្កគ្រោះថ្នាក់ធំដល់ជនរួម ជាតិរបស់យើង។ ខ្មែរមានចរិតមួយគឺជាចរិតដែលផ្អើលតៗគ្នា តាមពាក្យចាមអារ៉ាម គឺពុំអាចគិតពិចារណារកហេតុរកផលឲ្យឃើញច្បាស់លាស់បានទេក្នុង ស្ថានភាពដែលច្របូកច្របល់។ ឧទាហរណ៍ ការស្លាប់នៅកោះពេជ្រមូលហេតុមួយភាគធំ គឺបណ្តាលមកពីមានអ្នកស្រែកពាក្យចាមអារ៉ាមតៗគ្នាថាមានខ្សែ ភ្លើងឆក់ធ្វើឲ្យផ្អើលរត់ជាន់គរលើគ្នាភ្លាមមួយរំពេច។ អ្នកឃើញទេ??? គ្រាន់តែពាក្យចាមអារ៉ាមដែលនាំឲ្យស្លាប់នៅកោះពេជ្រក៏ខុសៗ គ្នាដែរ។ អ្នកខ្លះថាមកពីស្ពានពេជ្របាក់ ឯអ្នកខ្លះទៀតថាមកពីខ្សែភ្លើងឆក់។

កាន់តែអស្ចារ្យជាងនេះទៅទៀត គឺក្រោយពីការស្លាប់នៅកោះពេជ្រតែប៉ុន្មានថ្ងៃសោះស្រាប់តែមាន ពាក្យចាមអារ៉ាមបានលេចចេញមកមួយទៀតថា គឺត្រូវនាំគ្នាសែនចេកឲ្យខ្មោចនៅកោះពេជ្រដើម្បីការពារកុំឲ្យ ខ្មោចកោះពេជ្រតាមយាយីដល់ផ្ទះ។ មានរឿងមិនចេះអស់សោះ!!! ពាក្យចាមអារ៉ាមមួយម៉ាត់នេះធ្វើឲ្យផ្លែចេកដែលតាមធម្មតាមាន តំលៃប្រហែល ២០០០៛ ក្នុងមួយស្និតបានឡើងកប់ពពកដល់ ៤០០០០៛ ទៅ ៥០០០០៛ ភ្លាមមួយរំពេច ហើយត្រឹមតែរយៈពេលមួយល្ងាចសោះរឿងនេះបានល្បីសុសសាយពាសពេញផ្ទៃ ប្រទេស។ ចុះរូបខ្ញុំផ្ទាល់ និងអ្នកមួយចំនួនធំទៀតដែលមិនបានសែនព្រេនហេតុអ្វីបានជាមិនឃើញ មានបញ្ហាអ្វីទៅ? នេះហើយឬជាវិនាសកម្ម និងការឈឺចាប់ដែលកើតឡើងពីពាក្យចាមអារ៉ាមគ្មានហេតុផល?

៣. មិនត្រូវទៅទីណាដែលមានមនុស្សណែនណាន់តាន់តាប់៖ បើយើងនិយាយថា មិនត្រូវទៅទីណាដែលមានមនុស្សច្រើននោះមានតែយើងកុំនាំគ្នាទៅ ចូលរួមពិធីបុណ្យអុំទូក ពីព្រោះពិធីបុណ្យអុំទូកមានមនុស្សច្រើនណាស់ ដូច្នេះប្រើពាក្យឲ្យសមរម្យថា កុំទៅទីណាដែលមានមនុស្សណែនណាន់តាន់តាប់ដែលពិបាកនឹងរកផ្លូវចេញ នៅពេលដែលមានរឿងអ្វីមួយកើតឡើង។ រឿងមួយទៀតដែលអ្នកមិនត្រូវទៅដែរ គឺការទៅចោមរោមមើលហេតុការណ៍ណាមួយដែលកើតឡើងដូចជាមានមនុស្ស ខ្យល់គជាដើម។ សូមអ្នកកុំទៅអី គឺទុកឲ្យគេពីរបីនាក់ធ្វើទៅបានហើយ ដើម្បីកុំឲ្យមានការភ្ញាក់ផ្អើលបង្កឲ្យមានការចោមរោមកាន់តែ ច្រើនឡើងដែលគ្មានប្រយោជន៍ ព្រោះប្រហែលជាគេនឹងមានក្រុមសង្គ្រោះបឋមហើយ។

ទោះបីជា គ្មានបញ្ហាធំណាមួយកើតឡើង សូមរំលឹកអ្នកទាំងអស់គ្នាទុកជាមុនឲ្យហើយថា បើសិនជាអ្នកចូលចិត្តទៅកន្លែងអញ្ចឹងៗ អ្នកនឹងពិបាកដកដង្ហើមអាចនឹងខ្សល់គបន្តដល់ស្លាប់ខ្លួនបាន។ ម្យ៉ាងទៀតអ្នកអាចនឹងបាត់បង់របស់របរមានតំលៃដូចជាទូរស័ព្ទ ឬគ្រឿងអលង្ការជាដើម ដោយសារតែជនឱកាសនិយមវាឆ្លៀតលួច ឬប្លន់។ ដូច្នេះឃើញថា ត្រង់កន្លែងដែលមានមនុស្សម្នាណែនណាន់តាន់តាប់ គឺមិនផ្តល់ប្រយោជន៍អ្វីដល់អ្នកសោះ អ្នកមិនគួរទៅទេ ហើយបើជៀសមិនរួចពេលដើរឆ្លងកាត់ត្រូវធ្វើដំណើរឲ្យបានលឿន និងដោយប្រុងប្រយ័ត្ន។

៤. ត្រូវស្តាប់អាជ្ញាធរមានសមត្ថកិច្ចបញ្ជា៖ សូមបញ្ជាក់ប្រាប់អ្នកទាំងអស់គ្នាថា ដោយសារតែបទពិសោធន៍កាលរត់ជាន់គ្នានៅកោះពេជ្រឆ្នាំ ២០១០ កន្លងមក នៅក្នុងពិធីបុណ្យអុំទូកលើកនេះ អាជ្ញាធរបានត្រៀមកំលាំងជាច្រើនដើម្បីការពារ និងដោះស្រាយបញ្ហានានាដែលនឹងអាចកើតមានឡើង ក្នុងនោះមានប៉ូលីស ទាហាន និងឡានពេទ្យជាដើម។ ដូច្នេះ នៅពេលដែលមានរឿងអ្វីមួយដែលកើតឡើងនៅទីសាធារណៈ សូមបងប្អូនស្តាប់តាមការបញ្ជារបស់អាជ្ញាធរ ពីព្រោះអាជ្ញាធរជាទូទៅពួកគាត់អាចក្តាប់សភាពការណ៍បានទាំងអស់នៅ ក្នុងពិធីបុណ្យអុំទូកលើកនេះ។ បើបងប្អូនមិនស្តាប់អាជ្ញាធរទេ តើបងប្អូនមានជំរើសណាដែលល្អជាងនេះទេនៅពេលដែលមានរឿងធំណាមួយ កើតឡើង? គឺប្រហែលជាគ្មានទេ។

CAMTOPTEC យល់ថា ចំពោះការងារក្នុងការការពារក្នុងពិធីបុណ្យអុំទូកលើកនេះអាជ្ញាធរ នឹងធ្វើការបានល្អ និងដោយស្មោះចំពោះយើងទាំងអស់គ្នា ពីព្រោះគាត់ខ្លាចយើងមានគ្រោះថ្នាក់ និងក៏មានញាតិមិត្តក្រុមគ្រួសាររបស់អាជ្ញាធរទៅចូលរួមក្នុងពិធី បុណ្យនេះដែរ ដូច្នេះសន្តិសុខនឹងត្រូវបានតាមដានយ៉ាងយកចិត្តទុកដាក់។ ហើយបើអ្នកមានបញ្ហាផ្ទាល់ខ្លួនវិញ អ្នកត្រូវទៅរកអាជ្ញាធរដែលនៅក្បែរអ្នកបំផុតដើម្បីឲ្យគាត់ជួយ ដោះស្រាយ។ ដូច្នេះ យើងសន្មតថាអាជ្ញាធរជាមេកើយ ហើយត្រូវចេះស្តាប់មេស្តាប់កើយទើបល្អ។

៥. ពេលដើរត្រូវមានគ្នីគ្នាដើរជាមួយ៖ អ្នកមិនត្រូវដើរតែម្នាក់ឯងទេបើអាច ថ្វីត្បិតតែមានមនុស្សម្នាទៅចូលរួមច្រើនក៏ដោយក៏ពិបាកនឹងពឹង ពាក់បានដែរដោយសារខ្មែរច្រើនតែមិនទុកចិត្តគ្នា។ គួរឲ្យឈឺចាប់ណាស់ដែលជនជាតិរបស់យើងមានជំងឺមិនទុកចិត្តគ្នា ដូច្នេះក្នុងការរស់នៅប្រចាំថ្ងៃ យើងគួរស្វែងយល់ពីគ្នាឲ្យបានច្បាស់ដើម្បីធ្វើការសន្និដ្ឋានដោយ ទំនុកចិត្តមកលើគ្នា។ ប៉ុន្តែខ្ញុំបកស្រាយនេះ គឺផ្តោតតែលើមនុស្សខុសៗគ្នាច្រើនដែលទៅចូលរួមបុណ្យអុំទូកទេ។ ឧទាហរណ៍ថា នៅពេលដែលអ្នកខ្យល់គ តើបានអ្នកណាជួយបើសិនជាអ្នកមិនមានគ្នា? អ្នកដទៃអាចនឹងមកជួយ ប៉ុន្តែក៏មានជនឆក់ឱកាសមកលាយឡំផងដែរ ពីព្រោះក្នុងពិធីដ៏ធំនេះ គឺជាឱកាសដ៏ល្អសំរាប់ជនដ៏ថោកទាបនានា ប៉ុន្តែមិនមែនដល់ថ្នាក់បងប្អូនលែងទុកចិត្តពីណាសូម្បីតែម្នាក់ បាននោះទេ ទោះយ៉ាងណាបើដើរឲ្យមានគ្នាទើបជាការល្អសមនឹងពាក្យខ្មែរថា៖ ដើរឲ្យមានបី។

៦. គួរតែបង្កើតជាក្រុមស្ម័គ្រចិត្តពិសេសដើម្បីជួយដល់ជនរងគ្រោះ៖ ថ្វីត្បិតតែអាជ្ញាធរបានដាក់កងកំលាំងការពារក៏ពិតមែន ប៉ុន្តែអ្នកអាចចូលរួមគ្នាបង្កើតជាក្រុមការងារណាមួយដើម្បីជួយ សង្គ្រោះបឋមលើហេតុការណ៍នានាដូចជាខ្យល់គ ឬរបួសបន្តិចបន្តួចជាដើម។ ក្រុមនោះគួរតែជាក្រុមស្ម័គ្រចិត្តដូចជា គ្រូពេទ្យស្ម័គ្រចិត្តជាដើម។ អ្នកត្រូវមានសញ្ញាសំគាល់ និងធ្វើការណែនាំក្រុមអ្នកឲ្យមនុស្សទូទៅបានស្គាល់ផង។ នេះជាទំលាប់ល្អមួយរបស់ខ្មែរក្នុងការជួយគ្នាក្នុងគ្រាមាន អាសន្ន។ ម្យ៉ាងទៀត គឺរឿងបរិស្ថានមិនស្អាតនៅពេលដែលមានអុំទូកម្តងៗ គឺធ្វើឲ្យកន្លែងកំសាន្តនានាគ្មានសោភ័ណ្ឌភាព សុទ្ធតែក្រដាស ឬសំរាម…តើយើងគិតនាំគ្នាធ្វើយ៉ាងម៉េចទៅ? ដូច្នេះ CAMTOPTEC សង្ឃឹមថានឹងមានក្រុមដែលគិតគូរដល់បញ្ហាទាំងនេះ។

៧. ត្រូវរៀនគិតទុកជាមុនចំពោះហេតុការណ៍នានាដែលនឹងអាចកើតមានឡើង៖ បើមនុស្សភាគច្រើនទំលាប់រៀនគិតទុកជាមុន(មិនមែនគិតអាក្រក់ៗទេ គឺគិតរកដំណោះស្រាយដើម្បីត្រៀមខ្លួន) នោះមនុស្សនឹងអាចដោះស្រាយបញ្ហានានាដែលគេបានគិតនោះបានទាំងអស់។ ចំនុចនេះសំខាន់ខ្លាំងណាស់សូមកុំមើលរំលង។ មនុស្សជាសត្វដែលមានបញ្ញាអាចគិតរឿងដែលមើលមិនឃើញ ឬរឿងដែលមិនទាន់កើតឡើងបាន។ អ្នកសាកគិតមើលៗថា ចុះបើឆ្នាំនេះមានបញ្ហាណាមួយនៅផ្សារទំនើប អ៊ីអន (មនុស្សនឹងសំរុកទៅផ្សារនេះច្រើន) តើអ្នកនឹងធ្វើយ៉ាងម៉េច? ឧទារហណ៍ ស្រាប់តែមានអគ្គីភ័យ តើអ្នកត្រូវដោះស្រាយយ៉ាងម៉េចដើម្បីឲ្យសមស្រប? តើអ្នកត្រូវជួយគេដែរទេ? បើជួយត្រូវជួយយ៉ាងម៉េចដើម្បីកុំឲ្យមានបញ្ហាទាំងអស់គ្នា? អ្នកខ្លះគិតថា វាមិនអាចទេ! មែនវាពិតជាមិនអាច តែវាក៏អាចដែរ! មើលរឿងគ្រោះថ្នាក់នៅកោះពេជ្រមើល តើអ្នកណាខ្លះដែលគិតថា រឿងហ្នឹងវាអាចកើតឡើង? ប៉ុន្តែវាបានកើតឡើងរួចទៅហើយ។ របៀបគិតទុកជាមុន គឺជាចំនុចដ៏ពិសេសមួយរបស់មនុស្សឆ្លាតគ្រប់ៗរូប លុះបញ្ហានោះមកដល់គេដឹងថាត្រូវដោះស្រាយយ៉ាងម៉េច។ អញ្ចឹង សូមអ្នករៀនគិតរៀនស្រមៃមើល?

៨. បើគិតថានៅផ្ទះល្អសូមកុំទៅមើលគេអី៖ នេះជាទំលាប់មួយដែលល្អម្យ៉ាងដែរពេលដែលពិធីបុណ្យអុំទូកមកដល់ ម្តងៗ ជាពិសេសអ្នកភ្នំពេញតែម្តងច្រើនតែនៅផ្ទះ ហើយទស្សនាការប្រណាំងទូក និងទិដ្ឋភាពផ្សេងៗតាមរយៈកញ្ចក់ទូរទស្សន៍វិញ។ ក្រៅពីទូរទស្សន៍ ឥឡូវនេះគឺមិនដូចបីឆ្នាំមុននោះទេ គេក៏អាចតាមដានពិធីបុណ្យអុំទូកស្ទើរតែគ្រប់រឿង គ្រប់រស់ជាតិ និងគ្រប់ទិដ្ឋភាពតាមរយៈបណ្តាញសង្គម Facebook បានផងដែរ។ ដូច្នេះ បើអ្នកយល់ថា ការចូលរួមពិធីបុណអុំទូកពីចំងាយសក្តិសមនឹងរូបអ្នកក៏ជាការ ល្អ ព្រោះពេលទៅមើលផ្ទាល់ក៏មិនស្រួលដូចមើលតាមទូរទស្សន៍ដែរ ដោយសារតែមានមនុស្សច្រើនពេក ហើយចង្អៀតខ្លាំងណាស់ ក្តៅផង ពិបាកដកដង្ហើមផង គឺគ្មានសេចក្តីសុខទេ។

ក្រៅពីចំនុចទាំង ៨ ខាងលើដើម្បីឲ្យកាន់តែល្អប្រិយមិត្តត្រូវស្តាប់សារាចរណ៍ណែនាំ របស់រដ្ឋ និងស្វែងយល់ពីគំនិតសំខាន់ៗដទៃទៀត ដើម្បីរួមគ្នាបញ្ចៀសឲ្យបាននូវគ្រោះថ្នាក់ធំៗណាមួយដែលនឹងអាច កើតមានឡើងដោយការធ្វេសប្រហែស ធ្វើម៉េចគឺកុំឲ្យបុណ្យអុំទូកក្លាយជាបុណ្យអំពល់ទុក្ខ…។ បន្ទាប់ពីអានចប់ហើយ បើប្រិយមិត្តយល់ថាវាមានសារៈសំខាន់ សូមកុំភ្លេច Share អត្ថបទនេះដល់មិត្តភក្តិ សាច់ញាតិ និងបងប្អូនខ្មែរយើងឲ្យបានដឹងផង។ សូមឲ្យប្រជាជនខ្មែរជួបតែសេចក្តីសុខក្នុងពិធីបុណ្យអុំទូកក្នុង ឆ្នាំ ២០១៤ នេះ។

______________________________________________

ប្រភព៖ CAMTOPTEC