លោក ម៉ន ផល្លា ប្រធានគណៈកម្មាធិការប្រតិបត្តិ គណបក្សសង្គ្រោះជាតិ(CNRP) តុលាការរាជធានីភ្នំពេញ ចេញដីកាបង្គាប់បញ្ជាឲ្យសមត្ថកិច្ចនាំខ្លួន

ចេញផ្សាយ ថ្ងៃព្រហស្បតិ៍ ទី១០ ខែសីហា ឆ្នាំ២០១៧ ដោយ ៖ អង្គភាព CSN ទំនាក់ទំនងផ្ដល់ព័ត៌មាន នឹងផ្សាយពាណិជ្ជកម្ម 078 55 11 12 / 097 777 6000

ភ្នំពេញ ៖ ​កាលពី​ថ្ងៃទី​០៧ ខែសីហា ឆ្នាំ​២០១៧​កន្លងទៅ​ថ្មីៗ​នេះ អយ្យការ​អម​សាលាដំបូង ​រាជធានី​ភ្នំពេញ​ដែលមាន​លោក សៀង សុខ ជា​ព្រះរាជអាជ្ញារង បានចេញ​ដីកា​លេខ ​២០៦​អយ​ឋ ចុះ​ថ្ងៃទី​០៧ ខែសីហា ឆ្នាំ​២០១៧ បង្គាប់បញ្ជា​ឲ្យ​កម្លាំង​មាន​សមត្ថកិច្ច​ នាំខ្លួន​លោក ម៉ន ផល្លា ប្រធាន​គណៈកម្មាធិការ​ប្រតិបត្តិ ​គណបក្ស​សង្គ្រោះ​ជាតិ (CNRP) រាជធានី​ភ្នំពេញ ​ចូលមក​បង្ហាញខ្លួន ​នៅ​អធិការដ្ឋាន​នគរបាល​ ខណ្ឌមានជ័យ ​នៃ​ស្នងការដ្ឋាន​នគរបាល ​រាជធានី​ភ្នំពេញ ដើម្បី​សាកសួរ​ពី​ដំណើររឿង ហិង្សា​ដោយ​ចេតនា​ មាន​ស្ថាន​ទម្ងន់ទោស នា​ថ្ងៃទី​២៨ ខែឧសភា ឆ្នាំ​២០១៧ ។

​តាម​សំណើ​របស់​អធិការដ្ឋាន​នគរបាល ​ខណ្ឌមានជ័យ ​នៃ​ស្នងការដ្ឋាន​នគរបាល ​រាជធានី​ភ្នំពេញ ស្ថាប័ន​អយ្យការ​អម​សាលាដំបូង​ រាជធានី​ភ្នំពេញ ​ធ្លាប់​បានចេញ​ដីកា​លេខ ​១៥៧​អយ​ឋ ចុះ​ថ្ងៃទី​២៧ ខែមិថុនា ឆ្នាំ​២០១៧ រួច​ម្តងមកហើយ ដោយ​បង្គាប់បញ្ជា​ ឲ្យ​លោក ម៉ន ផល្លា ចូលទៅ​បង្ហាញខ្លួន ​នៅ​ធិ​ការដ្ឋាន​នគរបាល​ខណ្ឌ​មានជ័យ ឲ្យ​បាន​មុន​ថ្ងៃទី​១៧ ខែកក្កដា ឆ្នាំ​២០១៧ រៀងរាល់​ម៉ោង​ធ្វើការ ប៉ុន្តែ​លោក ម៉ន ផល្លា មិនបាន​ចូលទៅ​បង្ហាញខ្លួន​ឡើយ ទើប​អធិការដ្ឋាន​នគរបាល ​ខណ្ឌមានជ័យ​ ស្នើសុំ​ដីកា​បញ្ជា​ឲ្យ​ចូលខ្លួន​សាជាថ្មី​ទៀត​ នា​ថ្ងៃទី​១៨ ខែកក្កដា ឆ្នាំ​២០១៧ ។

​មជ្ឈដ្ឋាន​អ្នកច្បាប់​ឯករាជ្យ​នៅ​កម្ពុជា​ បានលើកឡើង​ថា លោក ម៉ន ផល្លា ប្រធាន​គណៈកម្មាធិការ​ប្រតិបត្តិ​គណបក្ស​សង្គ្រោះ​ជាតិ រាជធានី​ភ្នំពេញ អាច​នឹង​គេច​មិន​ផុតពី​ការចាប់​ឃាត់ខ្លួន​ ដោយ​កងកម្លាំង​ សមត្ថកិច្ច​តាម​ដីកា​បញ្ជា​ឲ្យ​ចូលខ្លួន ​របស់​តុលាការ​ ពាក់ព័ន្ធ​នឹង​សំណុំរឿង​ចោទប្រកាន់​នេះ ប្រសិនបើ​លោក ម៉ន ផល្លា បង្ហាញ​វត្ត​មាន នៅ​ប្រទេស​កម្ពុជា ៕​

សូមជួយស៊ែរព័ត៌មាននេះផង: