ករណីបង្ក្រាបបទល្មើសព្រៃឈើ នៅខេត្តក្រចេះ ត្រូវបានពលរដ្ឋគ្មានជំនឿ ថាមានតម្លាភាព

ចេញផ្សាយ ថ្ងៃសុក្រ ទី២០ ខែតុលា ឆ្នាំ២០១៧ ដោយ ៖ អង្គភាព CSN ទំនាក់ទំនងផ្ដល់ព័ត៌មាន នឹងផ្សាយពាណិជ្ជកម្ម 078 55 11 12 / 097 777 6000 នាយកការផ្សាយ

ក្រចេះ ៖ ថ្មីៗនេះ កាលពី​យប់​ថ្ងៃទី​១៨ ខែតុលា ឆ្នាំ​២០១៧ កម្លាំង​អាវុធហត្ថ​ ខេត្តក្រចេះ បាន​បង្ក្រាប​បទល្មើស​ព្រៃ​ឈើ​មួយ​ករណី ហើយ​រឹបអូស​ឈើ ​និង​គ្រឿងចក្រ ​ជា​វត្ថុតាង​មួយចំនួន​ផងដែរ​។

ប្រភពពី​មន្ត្រី​អាវុធហត្ថ ដែល​ចូលរួម ​ក្នុងការ​បង្ក្រាប​នោះ បាន​ឲ្យ​ដឹងថា ទីតាំង​កើតមាន​បទល្មើស ​គឺ​នៅក្នុង​បរិវេណ​ក្រុមហ៊ុន E.N Investment (UTM: 681742-1332159)​។ ហើយនៅក្នុង​ការបង្ក្រាប​នោះ ​សមត្ថកិច្ច​រឹបអូស​ យក​វត្ថុតាង​ជាច្រើន ​មានដូចជា ត្រាក់ទ័រ​ ៤​គ្រឿង រ៉ឺម៉ក​ផ្ទុក​ឈើមូល​ ៣​គ្រឿង រថយន្ត​បង្កុង​ ប្រភេទ​កែច្នៃ​ ២​គ្រឿង គ្រឿងចក្រ និង​អា​ប៊ុល​ចំនួន​៤​គ្រឿង ឈើមូល ​១០០​កំណាត់​ មានមុខ​កាត់​០,៤០​ម៉ែត្រ និង​បណ្ដោយ​១០​ម៉ែត្រ​។

​ប្រភពដដែរ បាន​ឲ្យ​ដឹង​ទៀតថា ក្នុង​ប្រតិបត្តិការ​នោះ មនុស្ស​៦​នាក់​ ជា​ជនជាតិ​យួន ត្រូវបានឃាត់ខ្លួន ​​ដើម្បី​សាកសួរ​ តាម​នីតិវិធី​។ តែទោះជា​យ៉ាងណា ​ប្រជាពលរដ្ឋ​ ក្នុងស្រុក​ស្នួល ខេត្តក្រចេះ ដែល​ជាប់​ព្រំប្រទល់​ ស្រុក​កែវ​សីមា ខេត្តមណ្ឌលគិរី បាន​លើកឡើងថា​ពួកគាត់​ គ្មាន​ជំនឿ​លើ​សមត្ថកិច្ច​ ក្នុងការ​បង្ក្រាប ​បទល្មើស​ព្រៃឈើ​នោះទេ​។ ដោយហេតុថា កន្លងមក ​អ្នក​ជាប់​ពាក់ព័ន្ធ​បទល្មើស​ព្រៃឈើ​ ក្នុង​ខេត្តក្រចេះ និង​ខេត្តមណ្ឌលគិរី តែងតែ​គេច​ផុត ពី​សំណាញ់​ច្បាប់ ហើយ​ជនជាតិ​យួន​ នៅតែ​អាច​ចូលមក​កាប់​ឈើ​ និង​ដឹកជញ្ជូន​ឈើ​ចេញទៅ​ស្រុក​យួន ​យ៉ាង​រលូន​ដដែល​។​

ការដែល​សមត្ថកិច្ច​ និង​មន្ត្រី​ជំនាញ ​ក្នុង​ខេត្តក្រចេះ បង្ក្រាប​បទល្មើស​ព្រៃឈើ ​មិនចេះ​អស់ គឺជា​មូល​ហេតុដែល​ធ្វើ​ឲ្យ​បទល្មើស​កាប់​ឈើ​ និង​ដឹកជញ្ជូន​ឈើ ​ចេញពី​ខេត្តក្រចេះ និង​មណ្ឌលគិរី នៅតែ​បន្ត​កើតឡើង ​យ៉ាង​អនាធិបតេយ្យ ជាពិសេស​ ជនជាតិ​យួន​ មិន​ញញើត​ក្នុងការ​ចូលមក​ ប្រព្រឹត្ត​បទល្មើស​ លើទឹក​ដី​ខ្មែរ​។ ជាក់ស្ដែង​ ករណី​កម្លាំង​អាវុធហត្ថ​ ខេត្តក្រចេះ បង្ក្រាប​បទល្មើស​ព្រៃឈើ​ កាលពី​យប់​ថ្ងៃទី​១៨ ខែតុលា ឆ្នាំ​២០១៧ គឺ​ឃាត់ខ្លួន​ជនជាតិ​យួន ​បាន​៦​នាក់ ប៉ុន្តែ​មន្ត្រី​សមត្ថកិច្ច​កម្ពុជា​ ដែល​ជាប់​ពាក់ព័ន្ធ​ នឹង​បទល្មើស​នោះ មិន​ត្រូវបាន​សមត្ថកិច្ច​ វែកមុខ​ឡើយ​។

ហេតុនេះហើយ ​ទើប​ប្រជាពលរដ្ឋ​ ក្នុង​ខេត្តមណ្ឌលគិរី និង​ខេត្តក្រចេះ គ្មាន​ជំនឿ​ លើ​សមត្ថកិច្ច​ អាវុធហត្ថ​ ឬ​សមត្ថកិច្ច​ពាក់ព័ន្ធ​ ផ្សេងៗ​ទៀត​ ក្នុងការ​បង្ក្រាប​បទល្មើស​ព្រៃឈើ ព្រោះ​ឈ្មួញ​ធំៗ ​ដូចជា ឧកញ៉ា សឹង សំអុល​, ឧកញ៉ា ជ័យ​, ឧកញ៉ា វ័ន ប៊ុន​ថៃ និង​មេ​ឈ្មួញ ជាច្រនទៀត នៅតែ​អាច​ ដឹកជញ្ជូន​ឈើ​ ចេញទៅ​ស្រុក​យួន​ តាម​ច្រកព្រំដែន ​ស្រុក​ស្នួល ខេត្តក្រចេះ ដោយ​គ្មាន​សមត្ថកិច្ច​ណា ​ហ៊ាន​ប៉ះពាល់​ឡើយ​៕

សូមជួយស៊ែរព័ត៌មាននេះផង: